CHOTI DURGA

ek din
mataa ke darbar mein
khadi thi ek ladki
pooch rahi thi pata
apne ghar kaa.

chhitron mein lipti
maili si bacchi
kyon mata ki sharan
mein jaati hai
kya usey apni parchaai
maata mein dikhti hai?

shayad usey pataa hai
ek din usey bhi log pujenge
uski aarti utarenge
jab woh koi karishma
dikhayegi
laal rang ki jeebh se
manushya ko darayegi.

waise bhi kaun puchtaa hai
ladkiyon ko aajkal
uske sapnon ke toot
jaane ki
kisko hai parwah?
chhitre man ki
yeh udasi hawa
hoton pe uske
phirbhi hai
tere mere liye dua.